من الساخر

نادر التوم … يكتب
سخرية الواقع و واقعية السخرية
أمنية جن!.
على قدر حجم الخروف تأتي (العزائم)
و تأتي على قدر الكرام (الولائم).
و تصغر في عين العظيم عجولها.
و تكبر في عين الصغير البهائم!
لقد أسمعت إذ ناديت حيا و لكن لا حياة لمن تنادي.
ناس الكهرباء، قلنا ليكم الدنيا عرفات ، و عيد، خليكم حلوين، لكين زي البنتكلم مع الكيبلات المقطعة و مشفشفة دي!.
ابت أنفسكم إلا أن تعكروا لينا افضل ايام الدنيا، بأسوأ حركات الدنيا!.
يفرق كتييير.
طعم الحلو لو ببقى مر.
(الشربوت ما بين اليوم الأول و باقي الأيام ) : اليوم الأول بكون (سكر سكر سكر) و حاة عيني سكر، أما إذا تركته أكثر، حينها عارف ح يحصل شنو؟ حا.
تمر بي من غير كلام.
و لا بس همس السلام.
تحايا و معايدات الاستاذ القامة (الحقيقية)، التجاني حاج موسى، و الرحمة للمبدع الراحل المقيم الأستاذ محمد ميرغني، و لروح الأستاذ عبد الكريم الكابلي، الذين كانوا يحملون أعيادنا و يعيدون جمالنا إن تاه أو أسر!.
في هذا العيد لاحظت حاجة غريبة خلاص :
الأطفال بقوا ما (بطقطقوا).
(الكلاشات) تقوم بهذا الدور تماما، كهرباء جات، عيد، اي حاجة ، و التي مع الأسف (الكلاشات)، أحيانا تكون في أيدي الأطفال!.
(قطار السوق متين ترحل تودينا ؟؟؟ – بالسين المفتوحة– ، لسان حال كثير من النازحين!.
القطر ارتبط بالخير و النماء، و الإخاء لذا لا بديل للسكة حديد الا القطر الجديد!.
و القطر الشالك إنت.
صحي يدشدش حتة حتة.
التقول ألقاها ملك.
جنس حسادة.. باقي الركاب ذنبهم شنو؟.
و لا قاصد بعد ينزلوا؟.
و القطار المر.
و القطار دور حديدو.
و قطر قروش مطر، أو كما يقولون!.
و اخبار القطر العاصمي شنو؟.
و لو جا يجيبوا ليو زحمة زي الزمان ديك من وين؟.
و يا حليل ناس ديك الزمان بجونا!.
قالت : لا أتمالك نفسي من الضحك، (و أنا أقرأ لك).
قلت: و انا لا أتمالك نفسي من الحزن و التوهان (و أنا أكتب لكم)!.
في الحقيقة هو (قال)، عشان في ناس ح يخلوا كل المقال، و يمسكو في القيل والقالت (منو)؟؟؟.
فاض بي (لهيب السوق)!.
_ بالسين النضمومة-.
لسان حال كل سوداني، داخل و خارج البلاد.
في ناس نفسها تحج و في ناس نفسها تهج.
في ناس مناها تشوف الحرم، و في ناس دائرة تسوح في الهرم!.
نعوذ بالله من الهرم!.
قلت ليو فكر خارج الصندوق، قال لي أنا مفكر خارج البلد دي!.
كان اسمها أم نية، حينما خطبها كانت أمنية حياته، كان بوصفها بأنها مكمن و مبعث كل حن، تزوجها فورته (الحن الصحي صحي).. سألوه حينها عن أمنية قال:( أمنية جن!).
الفينا مشهودة.
و………
الفينا.
هذه الكلاشات المحمولة ظهرا أو يدا، مغلقة جدا، الكلاش صار متوفرا أكثر من الكاش، الدعامة لم بخوفوا الناس لأنهم ارجل منهم، أو قلوبهم أحر، فقط لأنهم كانوا يحملون كلاشات، و لأنهم (كانوا) ـ زي النمل -.
في التاريخ أن ثورات أخمدت بسبب تغلب السلاح الناري، على الأبيض، فكيف بنا لا نهزم و نحن سلاحنا فقط (قلبنا الأبيض)؟؟!.
تخريمة:
هو في سلاح ناري أخطر و أكتر من عيونها؟.
و (كفها)، عند الحبيب الأديب هيثم أحمد الطيب!.
الصمت أيضاً له صوت . . . لكنه بحاجة إلى روح تفهمه!.
شمس التبريزي.
لحم الختام :
اكتب عن نفسك.
و أشرق زي شمسك.
استمتع بي هسي.
استمتاعك بي امسك.
شاور لي باكر.
و تابع لي حدسك.
مد البصر.
لي شوفك لي لمسك.
حبك لي ذاتك.
شان ذاتك بتمسك.
اطلق هتافك.
بي نبضك بي همسك.
اقول ليكم شئ: القابلة في بيتكم!.
هههههههههههه.
اللهم صل وسلم وبارك على سيدنا محمد وعلى آله وصحبه بقدر عظمة ذاتك يا أحد!ودعناكم الله.