بالدارجي الفسيح

  نادر التوم … يكتب
دخلتونا في (حسابات)!

(1)
ـ الزول بدون ما يشعر (في البلد دي)، يلقي نفسو بقى عميل، عموما عميل افضل من متعاون،
عميل على الأقل ممكن الناس ما تعرفك، لكن متعاون دي خطيرة، لدرجة يعتزم المعلمون عدم كتابتها في النتائج: ( متعاون مع زملائه،)، لانو زملائه ديل ممكن يكونوا دعامة عادي!
ـ و استبدالها بأي حاجة (ظريف، كيوت مع زملائه)، المهم اي حاجة غير (مصيبة الزمان دي)!
(2)
ـ عميل كويسة، و منتشرة و عادية، عادي تلقى (خدمات العملاء) في أي مكان، عملاء و عندهم خدمات، الما(في- نع) شنو؟؟
ـ المهم فجأة وجدتني من العملاء (المندسين)، لأنني لم أكن أعرف هذا، لقيت روحي (عميل في بنك النيل)، و الله إسم جميل!!
ـ تنبيه مع المرتب الفات و اللي اصلا بكون فائت قبل ما يجي، فايت مروح وين؟ ، الله أعلم. تنبيه مفاده أن المرتب القادم سيكون على، حسابك في  بنك النيل، و الحساب (معمول) شفت كيفن؟ فجأة كدا بقينا منيلين اقصد فاتحين حساب في النيل، يعني الليلة بالليل نمشي بنك النيل ماهية بي مزاج!
(3)
ـ و بما أنني أملك حسابات كثيرة، و عامل حساباتي كويس، فلي في بنك الخرطوم واحد و في بنك السلام واحد للشركة هذه أصبحت فيها عميلا بارادتي، بينما في بنك ام درمان الوطني حصل لي نفس ما حصل مع النيل اليوم ..
ـ فجأة صار مرتبنا في بنك ام درمان الوطني، لم نهتم سوى بأنه (حساب ماهية)، و لم يهتموا هم (ناس البنك) حتى باعطائنا رقم حسابنا، و اكتفوا (مشكورين)، بتسليمنا بطاقة الصراف الالي، التي كانت حاجة جديدة و فريدة لكثيرين!
ـ و على قناعة في ناس( لي يوم الليلة)، و بعد أن تحول حسابهم للنيل ما عارفين رقم حسابهم القبيل!
(4)
شخصيا يوم لقيت نفسي جنب البنك، و ما عندي موضوع، سألتهم لو سمحتو عندي حساب عندكم، ممكن اعرف رقمو كم؟؟ و الحمد لله سمحو و في ثواني اعطوني حسابي
ـ بعدها عملوا تطبيق (اوكاش)، كانت تجري على التطبيق حقي عمليات كثيرة و لا واحدة منها اجريتها انا.
(5)
ـ و طبعا حكاية الصراف و البطاقة، و أو كاش، بقت كلها من الماضي،  حيث كنا نصرف المرتب (كاش) بعد أن يحضره المدير (جزاو الله خير)، و في فترة الحرب (الصرفناها)، يحولها المدير بنكك (تعبان معانا)،
ـ  لكن لا اعرف ما المغزى و السبب من تحويلنا  و (تحويلتنا)، من ام درمان الوطني للنيل، و هو سؤال لي ناس البنكين، و لي ناس التعليم، الشغالين يحولوا في مراباتنا من بنك لي بنك (و هي ما بتستحمل)، و كلو مرة مبقننا عملا لى حتة جديدة!
(5)
ـ التحويل من بنك لبنك، و من تطبيق لتطبيق (ساهل)، مع أن هذا يحدث لخبطة شديدة حتى في اختيار كلمة السر اللهم إلا تعملها نفس حقت اوكاش، و بنكك و فوري و …. غيرها ـ الصعب هو تقديم خدمة للعملاء في هذا البنك، و اتمنى أن يفطن أهل النيل لهذه النقطة، التي ستفيدهم و تميزهم.،
ـ عملاء بنك النيل قليلون مقارنة مع الخرطوم و ام درمان الوطني
ـ و الآن بعد هذه (التحويلة) كترو ماشاء الله!
ـ طيب مفروض تقدموا خدمات على المرتب ، للمعلمين و (بقية العملاء )، التم تحويل مرتباتهم ليكم، نفس طريقة بنك الأسرة، البحولوا راتبك (اول شي)،  و انتو اصلا محول عندكم،، طيب اعملوا زي ناس الأسرة مولوا: (مشروعات، ركشات، تعليم، …. إلخ) ، و اخصموا بي راحتكم، (اصلا كلو ما جايب شي)!
ـ ختاما اتمنى للجميع التوفيق البنك و العملاء (زينا)
ـ و آمل من البنك أن يشرح للعملاء التطبيق و  طريقة تشغيلو ، حتى لو كان (ساهل)  و الخدمات التي يمكن أن يستفيد منها العملا حقنكم!
ـ (برعاية الدكتور عبد العظيم عبد الله الهادي برنامج التقويم الذاتي في الفيزياء)!
ـ للاعلان عبر مقالات الكاتب ارجو إرسال رسالة عبر رقم الواتس 0121500148 للوصول لمئات الآلاف من العملاء!
أسعار تنافسية للمؤسسات التعليمية و الصحية!
اللهم صل على سيدنا محمد و آله و سلم !
عامرين.
برعاية الاستاذ الدكتور عبد العظيم عبد الله الهادي (ديناميكا) 0912239052

مجموعات شرح مقرر الفيزياء كاملا (من الغلاف للغلاف)، لمعرفة التفاصيل التواصل مع الدكتور عبر رقم الواتس 0912239052.